"Волжскыш миенам"

Теле ыле. Ме кумытын имне дене Волжскыш кайышна.
Каймына годым мый пеш кылмышым. Вара мый куржаш тÿҥальым. Куржын-куржын, ырышым. Волжск олаш шуна. Пазарыш кайышна. Пареҥгым пеш налыт. Меат кум мешак пареҥгем ужалышна.
- Пареҥгыда уло мо? – эре йодыт.
- Ынде пытыш, - манына.
Кинде магазиныш пурышна. Киндым налын лекна. Терыш шична да кÿртньым ужалыме магазиныш кудална. Имньым öрдышкырак шогалтышна. Шкеже магагзиныш пурышна.
Мый пеш ечым налнем, ечым ончышым. Кугу ече веле уло.
- Тыгай ече ок кÿл, - маньым. И ынжа нал.
Мый лач магазин гыч лектам ыле, ала-могай руш пеш вурса, мый дечем йодеш:
- Ачат кушто? – манеш.
Мый вашкерак Виктыр изайым ÿжын луктым. Руш тугак пеш вурса:
- Молан имнетым пеледыш куштымо вереш шогалтенат? – манеш. – Сейчас штрафым тÿлыктем! – манеш. Шкеже ала-кушко каен колтыш. Ме имньым вашкерак кораҥден шогалтышнша. Каяш тарванынена ыле, ик еҥ толын шогале.
- Мыйын киндем пыштен нангада мо? – йодеш.
- Пыште, - манна.
Имньынам савырална да мöҥгашкö кудална. Пел корно наре кудална, мый чот кылмышым. Виктыр изам мыйым шÿкал колтыш. Мый тер гыч камвозым. Кынельымат, ну куржам! Поктен шуам веле – адак имньым покталта. Мый адак кертмемын куржам! Поктен шуым. Ырышым.
«Передовик» деке шуна. Чодрашкат лекна. Изиш кайышнат, Стапаныш шуна. Тушеч мöҥгышкат вашке толын шуна. Имне пеш ноен, пушлана веле.
Имньым туараш мый кайшым. Туарен тольым, касс лие. Малаш возым. Пеш ласкан мален колтышым.
Тыге мый Волжск олаш каен тольым.

Николаев Гриша
1964 г.

  К содержанию "Изи годымна"