"Урок деч вара"

Урок деч вара мый мöҥгыш кайшым, урокым ыштышым, кочкым да колым эҥырал Валерий ден коктын кайышна. Миен шуна. Эҥырым вÿдыш колтышна. Изиш лиймек, Валерий ик колым шÿдырен лукто, эҥыр гычше мучыштарыш. Тиде жапыште колжо кид гычше йывылдик! вÿдышко. Тудо эҥырвоштыржымат шуыш, кидшым мардеж вакшла пöрдыкта.
Кол тÿльырген ала-мо, вÿд умбак кузен возо. Валерий тудым серыш луктын пыштыш. Изиш лиймек, мыят луктым. Мыйын почеш адак тудат.
Иканаже мыйын эҥырвоштырым шумем годым уалаш эҥыр пижын шинче. Шукат шым шонкале, кемым кудашым, йолашым кергалтышым, вÿдыш пурен, эҥырым луктым.
Мемнан деч тораште огыл, ужава дирижержак ала-мо, пеш мурен шинча. Мый тоям нальым, ужавалан колтышым. Ужаван мурыжат кÿрылто да «бак» гына ыштен кодо.
Колым эҥырен ситаршнат, мöҥгыш толаш тарванышна. Мöҥгыш толшыла мурен-мурен, пеш толына. Ончал колтышна, ончылнына ÿшкыж толеш. Ме коранна. Тудат мемнан почешна толеш. Ме туддеч куржын утлышна.
Вес кечын Валерий денак пасуш пареҥге шындымашже кайышна. Шындаш тÿҥалме деч ончы топ дене модна. Вара пареҥгым шындаш тÿҥална. Имньым кандарыме годым вÿд йÿаш коремыш куржын колтышна. Тушто пушеҥге вуйышто корак пыжашым ужна. Корак пыжаш деке Аркаш кузыш, вич муным тушеч волтыш. Ик муныжым пудыртен ончышна. Муно коргышто иге кия. Изиш тарваныле да колыш. Ныл муныжым пыжашыш мöҥгеш пыштышна да адак пареҥгым шындаш тÿҥална.
- А кайык пыжашым ираш ок кÿл, - вурсышт кугуеҥ-влак.
Кас шуат, чылан, мöҥгеш толна.
Урок деч вара мый жапым сайын эртарем.

Польков Вячеслав
1964 г.

  К содержанию "Изи годымна"