"Случай-влак"

Кеҥеж кече пеш шокшо. Ме кеҥежым модына, чодраш коштына. Чодраште поҥгым погена. Поҥгыжо тÿрло-тÿрлö уло: то кукшо курс, то иле курс, коявоҥго, кÿжгÿвурго, ужарйымал, тулеч молат.
Ме икана акам ден коктын поҥгым аогаш кайышна. Чодраште поҥгым поген, ятыр коштна. Вара акам шола векла кайыш, мый – пурлашкыла. Ончем, мыйын ваштарешем мундыра гае пöрдын толеш, шкеже сур. Мый палышым: шоҥшо улмаш. Мый тудым нимат ыжым ыште. Эртен веле кайшым. Шкет коштын-коштын, мый тунам йомынам ыле. Йора адакат Элнетыш миен лектым, корным пален нальым. Элнет сер воктене кайшым.
Мöҥгыш миен шуым. Акай уже мÿшкыржым темен, авамлан пашам ышташ полша.
А вескана Мишук ден коктын колым кучаш кайышна. Колым кучымына годым шеҥгелнына кыж-гож шоктыш. Ончал колтышна, шемвуян кишке нушкеш. Ме Мишук ден коктынат кок велке тöрштышна. Мый кÿжгÿ тоям налымат, куржны мийшым. Кишке уже колен кия. Мишук воштылын шога, тудо пуштынат пыштен.
- Эх, - манеш, - кÿжгÿ тоя дене пуштын кертат мо? Кишкым пушташ вичкыж воштыр кÿлеш, тудо гына витара.

Петров Костя
1964 г.

  К содержанию "Изи годымна"