"Скирдым тошкенам"

Чевер кеҥеж толын шуо. 31-ше майыште мемнам кеҥеж каникулыш колтышт. Пытартыш кечыште мыланна линейкыште сайын канаш желатлышт. Мый кеҥеж кечым кажне кечын колхоз пашаш коштын эртараш решитлышым. А кеҥежым колхозышто паша моткоч шуко: олыкышто шудым солаш, ужар шудым, кургым силослан ямдылаш, олымым скирдышке опташ да шуко молат.
Мый олыкышкат, шудым удырымашкат, скирдовкышкат коштынам.
Утларакшым мыланем скирдовкышто келшыш. Ме, Галя ден коктын, скирдовкышто носилка дене олымым нумална, изирак копнам ыштен, имне поштек пижыктыл колтылна. Тиде пашаште шукыжым школьник-влак коштыт ыле. Скирдым шындымаште да тöрлатымаште гына кугуеҥ-влак вуйлатат ыле.
Икана мыйым Ксения Александровна кычкырал нале. Тудат скирдым ыштымаште кошто. Мый тудын дек мийшым. Мыйым скирд тошкам кÿзыктынеже.
- Огым, тошкен ом мошто, - манам мыйже.
- Кертат, - манеш тудыжо.
Мый кузышым. Тыге мый первый гана скирдым тошкышым. Тылеч вара мый эше ныл скирдым тошкышым. А скирдым тошкаш нимогай нелыжат уке улмаш.
Каныме жапыште ме олымышто модына ыле, тÿрло мыскарам ыштылына. Паша шижде эртыш. Мемнам бригада эн ончыч скирдовка пашам пытарыш.
Вашке у тунемме ий толын шуо. Ме уэш тунемаш тÿҥална.

Валя Соловьева, 8 «б»
1965 г.

  К содержанию сборника "Литератор № 7"