"Шырчык"

Ме шырчык омартам ыштышна, капка воктен шогалтышна. Омарта аҥжым кудвече окна велкыла ыштышна. Окна гыч тöр шырчыкым пеш кÿтена.
Шырчык вашке омарта ÿмбаке толын шинче. Вара омарта кöргышкыжак пурыш. Тушечын лекте, чоҥештен кайыш. Вес гана адак тольо веле. Ик шарчык веле толын да мый шкетынак шонышым. Тудо шкетын огыл улмаш. Изиш лиймек, вес шырчыкшат тольо. Нуно коктын лийыч.
Икмыняр кече гыч шырчык-влакна пыжашым опташ пижыч. Нуно тыге ыштат. Иктыже кая, весыже кодеш. Иктыже толеш, весыже кая. Тыге икмыняр кече гыч пыжаш ямде лие.
Кастене нуно иктаж витле нарын ик пушеҥгыш шинчыт. Вара ала-куш чоҥештат. Тудыжым эскерен кертын омыл. Эрдене мый шырчык деч ончыч кынелашат решитлышым, садыгак кынелын ом шукто. Тудо эрдене шкетынак лиешат, вара тудыжат кая. Шырчыкын каймыжым веле пöрткайык-влак кÿтат. Шырчык уке шеҥгеч омарташкыже толыт, кöргышкыжö пураш гына тÿҥалыт, шырчык ала-кушеч толынат шуэш. Чылаштымат поктен колта. А кудо пöрткайыкше ок кай гын, чÿҥгаш тÿҥалеш, кыра. Пöрткайыкет пеш ынеж кай гынат, огешат шиж, каенат колта. Кайдежат ок лий!
Шукыж годым шырчык шкет кодмыж годым шулдыржым перкален, мура. Мый окна гычем куанен ончен шинчем. Вет окна гычнаже тöрак коеш, тугак лÿмын шогалтенна.

Польков Вячеслав
1964 г.

  К содержанию "Изи годымна"