"Нина шпагат дене колым кучен"

Мый пöртышкö пурем ыле. Пöртончылно Нина шога да мыланем ойла:
- Ачий, мый шпагат дене мом ыштем, палет?
- Ала, - манам.
- Теве тидым пÿчкам да, издереш кылым ыштем.
Шкеже, чынак, пÿйжö дене шпагатым пÿчкаш тöчен шога. «Толашет да, шоналтышым, теве пÿй коклашкет пуртен шындет». Но нимат ыжым ойло, пöртыш пурен кайшым. «Тек ойло, шонем, садак колыштшашет уке, шке семынетак ыштет».
Пурышым пöртышкö. Шукат ыш лий, пöртончыч чаргыж магырыме шергылт кайыш:
- Авай, вашкерак толале! Ава-ай!
- Мо лийыч? – вÿта ончыч аважын йÿкшö шокта.
- Вашке толале-е! Ай! Ай-яй!! – Нина адак чок йöсын варгыжеш.
Мыят чурк! лийым: - Мо ынде шайтан лие? – шонем. – Но лекташ ыжым тÿҥал: пöртончылно аважын йÿкшö шокта:
- Мо лийыч? Пÿчкычак мо?
- Ала товар дене пÿчкын? Товар пöртончылно уке ыле. Кÿзö дене? Кÿзат тушто уке ыле. – Лекташ гына шоналтенам ыле, аважын йÿкшö адак шокта:
- Вашке пуро ачат деке, ачат тöрлата.
Но Нина огеш, витне. Аваже адак ойлыгы шокта:
- Пуро вашке, ит лÿд. Нимат ок ыште!
Ончем, аваже шке Нинам кидше гыч кучен, пöртышкö пуртыш.
- На, ончале, - манеш. – Ала-можым тöчен шоген!
Нина шпагатым кок мучаш гычын кученат, пеш шортын пура. Шкеже пÿй коклаж гыч лукнеже, эре шупшкеда.
- Ит толаше, - манам, - пÿетым ирен луктат! Теве шке луктам.
Вашкÿзым нальым, умшажым каралтышым, шпагатын ик мучашыжым пÿй коклаж гыч пÿчкым. Вес мучашым кучышымат, эркын шупшылальым. Шпагат лекте. Нинан пÿйжö кокла гыч вÿр койылалтыш.
Кастене Юрик, Валерик, Лида, Зоя – чыланат погынышт. Нина шкежат уло.
- О-хоч! – маньым мый. – Нина таче шпагат дене колым кучен!
- Кузе, кузе? – йодыт икшывем-влак.
- Тугак, - манам. – Колжо кугу! Пÿйжö гыч сакалтен луктын, а мый тудым вашкÿзö дене мучыштарен пуышым. – Шкеже кидем дене кол кугытшым Нинан капше кÿшкытым ончыктем.
- Э-э, тиде ачий мыйым ойла! – Нина тогдайыш. – Мый шпагатеш пишынам ыле!
Вара кузе лиймыжым Юрикмытлан шке каласкален пуыш. Нунышт воштылыт. Меат аваж дене воштылна. Нина шкежат магырмыжым шарналтен, воштыльо.
- Ынде иканат шпагатым пÿй дене пÿчкаш ом тöчö. Ачамын ойлымыжым колыштам, - манеш.

С.М. Кушаков
27 декабрь 1959 ийын