"Олыкышто сай"

Кеҥежым мый олыкыш, силосыш, скирдыш коштынам. Мыланем олыкыштыжо поснак чот келшыш.
Олыкышто ме вÿд вес веке пуш дене вончышна. Вончымеке паша ышташ пижна.
Шудым удырен коштмаште кечывалат вашке шуо. Кечывал кочкышым ыштышна. Кÿмыж-совлам мушмеке, Люба дене вÿд тÿрыш миен шична. Ончена, йоча-влак пушышко пеш шинчыт. Тидым ужын, меат ыжна код. Моторым виктарыше Сурский Володя ыле. Тудо мемнан икымше бригада турашкырак наҥгайыш да тушечын тöрак пушым вес серыш савырале. Вÿд ÿмбалне юалге, адакат пушышто шинчыме веле шуэш ыле. Но пашаш пижашат жап.
Ынде кече ÿлыко волен. Ме чыланат краплям пушыш пыштен, вес серыш вончышна. Кугуеҥ-влак ыштат коч, вашке машинашке кÿзен шинчыч. Нуно кокымшо машинаш пеш ынешт кай, тушан чыла йоча-влак кайышт.
- Нунын мöҥгыш каймекышт пашашт уке, - маныт.
А таче мыланна молан вашкашыже? Ме таче, йоча-влак, малаш кодына вет?
Ме малаш кодмыланна пеш йывыртенна. Юл тÿрышто пароходым ончаш шична. Пеш шуко ончен шинчышна, вара олык омашыш пурен шична. Люба, Люда, вес Люба да мый ала-могай йомакымат ойлен кийышна. Малыме ок шу. Ынде ме йомак ойлымынамат чарнышна. Вес омашыште модын-воштыл шинчымыштым колышт киена.
Тыге киймына годым Зоя мийыш да кычкырале:
- Кынелза! Вашке кынелза! – манеш. – Ончыза, ончыза, могай сöрал пароход кая!
Меат вашке гына омаш гыч лекна да ончал колтышна: пеш сöралын коеш – кÿрен, ужарге, нарынче свет дене пароход сöралген.
Ме пароходым ончымеке малаш тек ыжна воч, модын куржталаш веле тÿҥална. Модна, модна, модын куржталмаште нойышна, да омашыш канаш пурен шична. Шинчымаштак мален колтенна.
Эрвелешрак кынельым, ончем – Любан шÿргыштыжо шÿч уло. Любат шинчажым ÿштын-ÿштын кынеле. Вара Филиппова Люба ден Люда кынельыч. Ме вес омашыш кайышна. Тушто але пеш малат, а шÿргышт нунынат шемын веле койын кият.
Мемнан воштылмо йÿкеш чыланат помжалтыч.
- Йÿр йÿреш мо? – маныт.
- Уке, - манына. – Але эше эр веле, кок шагатат латвич минут.
Кече тиде эрдене пылан ыле. Мемнан модмо коклаште изишлан кече лекте, вашке тудыжат пыл йымалан йомо. Изи йÿр йÿрын кайыш. Жап индеш шагатат шуо, а кугуеҥ-влак олыкыш алят огыт тол. Мыланна тыште ынде мом ышташ? Кугуеҥ-влак уке улыт!
Ме чыланат иквереш мöнгыш толна, а корнышто шÿчаҥ пытыше шÿрго-влак нерген утен каен воштылна. Кузе шÿчаҥме – нигöат нимом ыш пале.

Зоя Петрова, 6 «а»

  К содержанию сборника "Олыкышто"