"Лидан мÿшкыржö коршта"

Лида урем гыч толын пурыш. Мый пöртыштак ыльым.
- Молан шортат? – шортмыжым ужын, йодам.
- Мÿшкырем коршта-а! – Лида нюсленак шуялтыш.
- Мо вара лийын мÿшкыретше дене?
Лида шинчажым ÿштыштеш, утыр магыраш талышнынеже… Но мый умылынемак.
- Ойло, - манам, - кугун коршта мо? Ала эм кÿлеш?
- Уке, - манеш. Шкеже омса тÿрыштак шога, ончыкла каяш огешат тошт. «Ну, тугеже, шонем, эм кÿлешан мÿшкыр корштымо огыл. Мо гынат, весе».
- Лидуш, - манам, - каласе, мо семын мÿшкырет коршта?
- У-ууу! – магралтышат, ойла: - Миконор Колька карыш! Мÿшкыр гычем пеш корштарыш!
- Тоя дене лупшале мо?
- Тоя дене огыл. Мушкындыж дене пеш тазан шуралтыш!
- Но вет мÿшкыретше чÿчылтын огыл? Кишка ок його?
Шкеже чоян воштылам. Модмаште йоча коклаште мо ок лий? Кажне шортмым кушто лончылен пытарет?
- Ну, - манам, - Лида ит шорт! Корштымыжо чарна. Вет вÿрак лектын огыл?
Ит шорт манмемжат ындыже такат ок кÿл лийын. Вет Лида «мÿшкыретшак вет чÿчылтын огыл» манмекемак, шкежат тунамак шортмыжым чарнен. Ындыже воштылеш веле.
- Вернак, ындыже мÿшкыремжат ок коршто, - манеш.
- Вот, - манам, - а тый магрет! Мий, модаш кае!
Лида воштылалят, куржын колтыш.
- Модмаште ала-моат лият, ачий, - манеш. – Ме ынде сайынак модаш тÿҥалына!
Ик жап гыч мый нунын уэш куанен модмыштым окна гыч уремеш ужым.

С.М. Кушаков
28 декабрь 1959 ийын