"Мераҥым комбайнер кучен"

Ик эрдене мый выньыкым нöрташ лектам ыле. Люба йолташем мыйым ужат, пырчым шупшыктымашке каяш ойлыш. Выньыкем вашкерак нöртен пурышым, пöртым ÿштедышым да пеш йывыртен, пашашке тарванаш тÿҥальым. Пу кольмым ямдылышым. Паваем йодеш:
- Уныкам, кушко тыге пеш тарванет?
- Пырчым шупшыкташ, - манам.
Капкам лектым, лач Аля, Зина каят ыле. Машинаш шична. Пасушто кок бункер пырчым машинашке ястарыктышна. Пистер идымыш тудым намиен ястарышна.
Кокымшо ганалан комбайн деке кудал миймеке путырак оҥай ыле. Мемнан «У куат» колхозыш тунам Ленин лÿмеш колхоз гыч полшаш толыныт ыле. Комбайнер Яковлев шке комбайнже дене талын тÿредеш. Мемнан миймашеш тудо мераҥым кучен. Мераҥже лÿдо, изи. Мыланна тиде пеш оҥайын чучо. Комбайнер мераҥым пылышыж гыч сакен, а мераҥже кычкырал колтыш. Мый гын, пеш лÿдым да чаманен колтышым. Машинашкына пырчыжым вашкерак ястарыктышна да писын кудал колтышна.
Кечывал марте ныл машинам наҥгайышна, ик машинашыже кок бункерым оптена.
Кечывал деч вара шофёрлан мемнан дене Тимофеев Геннадий кошто, тунам ме адак ныл машинам ястарышна. Тыге эр гыч кас марте кандаш машина пырчым ястарен коштна.
Паша пеш сай ыле, изи мераҥымат ужна.

Синичкина Люба, 6 «а»

  К содержанию сборника "Олыкышто"