"Чыве фермым ыштымаште"

Ик кеҥеж кечын, эрден эрак кынелын, паша вургемым чиен шындышым. Кочкым, йÿм да чыве фермым строитлымашке ошыльым. «Пашашке налыт, уке?» - шонкален каем.
Ушкал ферма деке шуым, ончем, склад воктене еҥ-влак шинчат. Мый тушко мийшым да Лиза Лунинам ужым. Тудат паша вургемым чиен ыле. Мый шижым: Лизат, мыйын семынак, пашаш толын.
Мый пашам стройкышто але ыштен омыл, кö мастерже – омат пале. А Лиза тиде пашаш уже коштын. Лиза мыланем ойла:
- Теве – мастерже, - манеш, - Зелалов. Йодын очно, ала налыт?
Шинчыше кокла гыч Зелаловет тöрштен кынелят, ойла:
- Ну, рвезе-влак, пашаш пижаш кÿлеш!
Лиза тудын дек мийыш да ойлаш тÿнале. А мый колыштам. Пашам налыт, але уке, шонем. Шукат ыш лий, шижынат шым шукто, Лиза мыйын век савырныш да воштылале:
- Пашашкет налыт, - манеш. – Айда пырля каена!
Мый пеш куанышым. Лиза ден пырля пашам ышташ тÿнальым.
Пашаште кече вашке эрта. Эрден миена, пашаш пижына. А кечывал жапыште газетым, книгам лудына. Кочкаш пеленна налына ыле. Пырля шинчынат, кином ончымынамат ойлена. Тыге кечевал каныш жапат вашке эрта, уэш пашаш пижына. Пашам мый йöратен ыштышым. Мемнан ыштыме фермыште вес ийлан вич тÿжем чыве илаш тÿҥалеш, нуно колхозланна кугу доходым пуаш тÿҥалыт.
Кеҥеж каникул мыйын стройка пашаштак эртыш. Паша гыч толмеке, кинош, концертыш каем ыле.

Лида Соловьева, 7 «в»
1965 г.

  К содержанию сборника "Литератор № 7"